 |
ilustrasi
Het meer Lau Kawar aan de voet van de vulkaan Sinabung
Date : 1910-1925
Source: Tropenmuseum
|
Bapa nguda si mangku
kerajaan sitik pe la nai pang ngerana. Ije nterem kel jelma, enggo bagi lembu
iadu e ndahi sapo si Rindu Tubuh ibas kerangen. “Duana ko ibunuh kami, perban
engko enggo sumbang, maka reh kelegon ndekah, lau i sumbul pe enggo kerah,
senduduk la nai pang erpucuk, ndukur pe lanai pang tekukeru, rubia-rubia kami
pe i mbal-mbal mbue enggo maten.”
“Ola kami ibunuh kam, adi
udan kin atendu banci ibahan kami,” nina si Rindu Tubuh si dilaki.
“Bahan dage udan, adi la
kari udan, mate nge engko ibahan kami,” nina si nterem.
E maka idilo si Rindu Tubuh
si dilaki udan, minter erkata lenggur, kilap sagan sumagan, angin
marginja-ginja. Nusur me udan meder kal. Udan si lalap. Pelangkah babi ibas
kesain pe enggo keri mombaken. Babi ras biang, manuk ras itik, lembu, kuda ras
kerbo reh buena maten ibahan udan si la erngadi-ngadi.
Mulihi ka kalak merawa man
si Rindu Tubuh. “Bunuh si Rindu Tubuh, ibahanna udan la erngadi-ngadi, angina
meter si lalap, lenggur la erngadi-ngadi, kilap lalap sagan sumagan, enggo
melala mombak lembu, kerbo, kuda, babi, biang, saponta pe enggo melala
runtuhen,” nina kerina ginemgem.
Ersada arihna kerina munuh
si Rindu Tubuh. “Ibunuh ko duana, perbahananmu udan la erngadi-ngadi, rumah
kami runtuhen, ibahan ko angin kaba-kaba!” nina kerina ginemgem nterem rehen.
“Adi kutera pe la sikap, bunuh
gelah aku, adi lego, ibahan ko lego nindu kerina, adi reh udan, perbanmu maka
mombaken rubia-rubia kami, runtuhen rumah kami nindu,” nina si Rindu Tubuh si
dilaki, sitik pe la ia erlawan.
E maka ibunuh si nterem si
Rindu Tubuh si dilaki. Kenca ia mate ibunuh, minter kal ngadi udan, anginna
marginja-ginja pe ngadi, lenggur ras kilap sumagan pe ngadi.
Muatna ngkeriken kesahna,
ngerana sekali nari si Rindu Tubuh si dilaki, nina, “Adi banci turangku nguda e
ola ibunuh, sabap ia pagi mereken tawar tulbas man bandu kerina. Mayatku padi
kuburken ibas uruk-uruk pintu-pintu kuta, gelah kuidah kal rusur turangku e
erdalan arah dalan e muatna ku juma ras muatna ku rumah.”
“Adi e kal ngenca
pemindonmu, banci,” nina si nterem.
E maka ibahan si nterem me
kuburenna ibas ingan si nipindona. Isuan turangna si nguda man lape-lapena kayu
si merimbun, galuh si tabar, sangke sempilet, besi-besi, kalinjuhang ras si
debanna.
Tapi andiko kal! Turah me
ije kayu si galinggang raya. Mulai kenca kayu si galinggang raya erbulung, mulai
me reh pinakit jaba-jaba man danak-danak. Adi ibenaken kenca erbunga, maka
meriah me penakit reme. Adi mulai ia erbuah, meriah me penakit laya-laya.
Maka lit kap nina sada guru,
ipergermetkenna rusur paksa-paksa reh pinakit e, payo rusur paksa erbunga,
paksa erbuah. E maka nina guru enda ndai man jelma si nterem, “Erkiteken kayu
si galinggang raya maka rusur reh pinakit jaba-jaba, pinakit reme ras
laya-laya. Adi mena ia erbulung, minter gelgel reh jaba-jaba. Adi menakenca ia
erbunga, minter gel-gel reh reme. Janah adi kenca ia erbuah minter gel-gel reh
pinakit laya-laya. E maka sisampetken gelah kuburen si Rindu Tubuh si dilaki ah
ndai ku lawit si mangko-mangko.
Ersada kerina arih jelma si
nterem. Minter icedakenna kuburen si Rindu Tubuh si dilaki e. Ikurkuri tulan-tulanna,
jenari itutungna. Abuna ibabana ku tengah lawitna si mangko-angko. Ije
isampetkenna.
Tapi amina bage pe kepe,
turah kang i tengah lawit si mbelang e, kayu si galinggang raya. Reh ka nge
rusur pinakit. E maka reh ka nina guru ndai, “Sampetken gelah si Rindu Tubuh si
diberu, perban ia nge maka turah denga rusur enda pinakit jaba-jaba, pinakit
reme, ras pinakit laya-laya si erbahan ate mesui jelma manusia.”
Minter tek kerina jelma si
nterem. E maka ersada kerina minter arihna nangkap si Rindu Tubuh si diberu.
Minter iselukenna ku tengah lawit si mangko-angko, ije igedapkenna gelah mate
atena. Jenari mulih kalak si mabasa ku tengah lawit si mbelang e.
Kepeken adi langa seh sibar
nina Dibata, mate enda labo terban-ban. Ibas sada wari lit sakalak
pengkawil-kawil jumpa sada diberu singuda-nguda ampar-ampar enggo masir i tepi
lawit. Perbahan erkesah denga, ibabana ku rumahna, jenari ikatakenna man
ndeharana gelah ibereken uisna si kerah, janah minter ibere man. Sabap mekuah
kal atena. Kenca piga-piga wari ia ibas rumah e, erkiteken pengkawil-kawil e
enggo iakapna bapana, janah ndehara pengkawil-kawil e iakap na nandena kal,
nina sekali asum man berngi, “ Kam me bapangku bapa, kam me nandengku nande.
Sabap bicara la kam duana nampati aku enggo me aku mate. E maka ola kal
ikataken kam aku i rumahndu enda, sabap aku si Rindu Tubuh si diberu, si beluh
erbahan tawar tulbas, si enggo igedapken jelma si nterem i tengah lawit si
mbages.
Bicara la kin Dibata
nampati, enggo me aku mate, ije sempat aku ijemba-jemba gelumbang si mbelin seh
ku tepi lawit, seh masir. Adi kerna pergeluhndu duana seh kam mate, ola atendu
aru, aku lalap ngurus kam. Kataken man jelma si nterem bapa, maka kam beluh
erbahan tawar ras tulbas. Erbulung kenca pagi kayu si galinggang raya i tengah
lawit si mangko-angko reh me pinakit jaba-jaba. Ije asakai pagi iberekendu
tambarna minter nge malem. Janah erbunga kenca pagi ia, reh me pinakit reme. E pagi
minter nge malem itambari kam o bapa. Janah erbuah kenca pagi ia, maka meriah
me pinakit laya-laya. E pe pagi, malem kerina itambari kam bapa. Ningen kam si
nambari, si tuhuna aku kap raja tawar tulbas, janah kakangku kap ndube raja bisa
maka ibunuh kalak bapa. Aku pagi erbahan tambarna bapa, kam pagi si
nambarkenca. La pagi lit jelma si la malem itambarindu bapa. Sabap bulung-bulung
si apai pe adi enggo arah tanku, enggo kap jadi tawar, e bekas pemere Dibata
kap ndube.” Ngandung ia ngatakenca.
“Ola kam ngandung anakku,
kam kap anak kami, lain kam labo lit ise pe, aku bapandu, nandendu e jadi
nandendu,” nina pengkawil-kawil.
“Enggo me anakku, ola nari
kam ngandung, manken” nina ndehara pengkawil-kawil.
Meriah kal ukur pengkawil-kawil
ras ndeharana, erkiteken kidekahna erjabu la enggo lit anakna.
Kenca elah man, nina si
Rindu Tubuh si nguda, man nande bapana, “Ola ise pe meteh maka si Rindu Tubuh
kap si beluh erbahan tawar tulbas e nande bapa. Kataken gelah kam nge rusur
erbahan tambar e.”
“Keleng nge ate kami man
bandu anakku,” nina ndehara pengkawil-kawil. “Erbulawan pe nggit kami anakku
maka kam tek.”
E maka erbulawan ia duana,
amina la gia isuruh si Rindu Tubuh. Ibuatna sada manuk megara, e maka erbulawan
ia ras ndeharana, maka mate pagi ia ibunuh manuk megara si nipanna, adi
ikatakenna rusia si Rindu Tubuh man jelma si nterem.
“Adi enggo kam erbulawan
nande, bapa, aku pe erbulawan maka kam tek, adi la pagi kam kuasuhi kidekahndu
nggeluh, mate kal aku ibunuh jukut daging manuk megara enda,” minter
idahupkenna.
Kenca si e enggo bagi anakna
kal iakapna si Rindu Tubuh. Janah si Rindu Tubuh pe nandena ras bapana kal
iakapna ndehara pengkawil-kawil ras pengkawil-kawil. Kerina kalak la lit nangkasa
maka nggeluh denga si Rindu Tubuh si nguda, sabap lit nge piga-piga kalak mbaru
enda nggedapkenca i tengah lawitna si mangko-angko.
Kenca bage reh me tuhu
pinakit jaba-jaba. Rehen kalak mindo tambar man pengkawil-kawil. Kerina si
nitambarina malem. E maka beras pukulen e saja la terkerikenca teluna man
nakanna. Bage ka pe dagangen si nibaba kalak, la kerisa man uisna teluna. Duit pe
lit ibereken kalak sitik-sitik, dungna enggo jadi melala.
Kenca ngadi jaba-jaba reh
reme. E pe malem kerina itambari pengkawil-kawil. Malem kerina pinakit reme,
reh ka pinakit laya-laya. E pe asakai si reh ertambar man pengkawil-kawil
kerina malem itambarina. Pinakit si deban pe malem itambarina.
Bagem dalanna maka rehen
rusur jelma mereken beras pukulen, dagangen mbentar, maba manuk man pangan
guru, seh dungna enggo bagi tiga e rumahna. Tapi nina si Rindu Tubuh, “Beras
pukulen ngenca ialoken, ras dagangen, duit sitik. Sabap adi meduit guru erdosa
man Dibata.”
*****************
Dari buku Seri Turi-Turin
Karo : Beru Dayang Jile-jile, disusun oleh Masri Singarimbun dan Ngukumi Barus.
Cetakan I tahun 1989.
cetakan II tahun 1990. Penerbit Yayasan Merga Silima. Dicetak oleh PT. Kesaint
Blanc Indah Corp.
Si Rindu Tubuh adalah satu cerita dari 13 cerita rakyat di buku ini.
Comments