Si Rindu Tubuh

ilustrasi

Karolanden.Een kind met zilveren sieraden, Karolanden.

Date : 1914-1919

Source : Tropenmuseum

Author : T. (Tassilo) Adam (Fotograaf/photographer)

Ibas turin-turin enda, maka turiken, lit me sada kerajaan mbelin, gelarna Kerajaan Negeri Benua Ketengahen. Kerejaan enda she kal belangna. Mehaga dingen termulia kal rajana ku si belang-belang pertibi enda. Kata raja, kata gung, mbiring nina si mbentar e pe mbiring, janah si mbentar e pe adi mbiring nina si bentar e pe mbiring, bagem masinna sorana. Aminna bage pe beluh kal ia ngaturken ginemmenna. Bagem dalanna maka kerina ginemgemna banci iaturkenna.  Page si nisuan kerina turah mehumur. Manuk pe merih kerina iasuh ginemgem.  Iakap ginemgem erkiteken raja sangap. Aminna gia si mbiring nina mbentar, si mbentar nina mbiring, tapi si tuhuna, keleng kal nge atena ginemgemna, sabap labo enggo mbentar nina si mbiring, janah labo enggo mbiring nina si mbentar.

Enggo ndekah raja erjabu ras kemberahen. Kemberahen pe ikut rusur man penggurun ginemgem. Ibas sada paksa, kenca enggo ndekah erjabu raja ras kemberahen, maka mehuli me kula kemberahen. Raja ras kemberahen meriah kal ukurna. Janah ginemgem pe kenca ibegina berita bage, meriah ka kal kerina ukurna. Tapi ibas paksa kemberahen natang tuah e, reh tahun si ago-ago. Reh me kelegon. Kerah me bulung-bulung i kerangen ras dukut-dukut i mbal-mbal. Bulung senduduk pe enggo kerah. Lau si kitik pe enggo kerah. Lau si mbelin enggo kitik. Kirik ras saringgupgup pe enggo mangani page. Asuh-asuhen i mbal-mbal pe enggo melala mate. Ndukur pe la nai pang tekukeru. Terbangun pe la nai turah. Ijem paksana kemberahen mupus. Mupusken anakna si ntua dilaki, janah si nguda diberu. Rindu.

Isuruh raja me idilo guru si beluh niktik wari si telu puluh, si ngeteh katika si mehuli entah pe jahat, guru si beluh ngenehen retak seribu kerna nasip jelma manusia. Nungkun entah kuga denggo pergeluh anak si mbaru tubuh enda.

Kenca itiktik guru warina tubuh rikut pe penerangna, maka nina guru man raja, “O rajangku, maka ngikutken kata wari rasa katika penerangna tubuh, maka ngikutken pemetehku rasa kata pustaka na jati, maka anak enda tubuh ibas wari tula, penerangna erpagi-pagi, katikana pe katika gang-gang. Ia pagi ernande empat berngi, janah er bapa ualuh berngi.” Megi kata guru enda, nembeh kal ate kalak kerina. Janah iukurken kalak maka guru enda ibunuh. Je nina guru terdauhen, “Warina wari mbelin rajangku, la lit jelma pang isenggangkenna. Si dilaki melas bagi rara api, tapi si diberu rajangku mbergeh, malem kalak si bangger ideherina. Tapi duana pagi ia erbaba ate mesui, o rajangku.”

Je payo me tuhu tande warina empat, mate me kemberahen, janah tande ka warina ualuh, mate me raja. E, maka ibahan agi raja me kerja mbelin nguburken raja ras kemberahen. Melala me rubia-rubia ipantem man bengkau. Sora bedil ras mercun la erngadingadi. Sora gendang pe la erngadingadi. Empat puluh wari empat puluh berngi ibahan kerja nguburken raja ras kemberahen e. Erkiteken raja ras kemberahen enggo mulih ku taneh pengulihenna, maka kidekah empat puluh uari e, ise pe la banci tawa. Kerina erceda ate. Iluh lalap denga ibas mata. Tambah-tambah si e, ise pe la banci erbahan kerja, ise pe la banci make uis mejile.

Maka Kerajaan Benua Ketengahen ipangku si nguda. Kenca dung penguburen raja ras kemberahen, rukur raja si mbaru, kuga ndia ibahan man anak si rindu tubuh, si mbaru mbelin, si lanai erbapa, la nai ernande. Anak penunda duanna. Adi munuhsa ningen la atena melas. Tambah-tambah keleng ka kin atena. Adi i rumah ibahan, mbiar kalak kerina itundakenna. Bangger kalak ibahanna. E maka isuruhna kalak erbahan sapo ibas sada kerangen pulo-pulo kuta, la ndauhsa ibas kuta nari. Kenca dung, kuje isuruhna itaruhken anak si mbaru belin e duana. Si meresa minem ras nakan, isuruhna sekalak tua-tua enggo balu-balu. Bagem rusur, entah lit dadih kambing kalak, entah dadih lembu kalak, ibereken diberu e man inemen anak si sope mbelin, nakanna pe iberekenna rusur melala.

Ije rukur ka me bapa nguda si rindu tubuh, “Adi bagenda entah ulin nge kutenahken kaka tua (turangna kemberahen Raja Kepultaken), ku Negeri Kepultaken, bage pe kalimbubu ku Kesunduten si mantangken babi ras biang.

E maka ibahanna me juak-juakna maba tenah ku Benua Kepultaken ras Benua Kesunduten, ngataken maka raja ras kemberahen Negeri Benua Ketengahen enggo mulih ku tanah pengulihenna. E maka reh me tuhu raja Negeri Benua Kepultaken bage pe raja Negeri Benua Kesunduten, ikut kemberahenna ras kerina juak-juak rikut simbisana nterem. Kerehenna ipetunggung ikut anak beru, senina ras kalimbubu. Kenca ia seh i Negeri Benua Ketengahen, ituriken bapa nguda si rindu tubuh me kerna perpate raja ras kemberahen, bage pe kerna anakna si nitadingkenna si rindu tubuh.

Rindu ia sada dilaki janah sada diberu. Erkiteken raja Kepultaken pe guru belin ka nge, e maka inehenna ibas gerek-gerekkenna, janah ngikutken warina tubuh ras penerangna, maka anak si dilaki enda me raja bisa, janah si diberu enda me rajana tawar. E maka iogena wari, maka dua wari nari ibahan kerja gelah i petelayoken anak melumang enda duanna. Ibas wari si enggo itentuken e, maka anak si dilaki iembah mamina, kemberahen raja Negeri Kesunduten, janah anak si diberu si nguda, iembah bibina, kemberahen raja Negeri Kepultaken. Nina kemberahen raja Kesunduten, “Melas kal gurungku kuakap.”

Reh nina raja Kesunduten, “Tahanken, bagi kin adi beberenta ibaba ku layo.” Tapi bage pe la tertahanken kemberahen raja Kesunduten. E maka nina raja Kesunduten man kemberahen, “Adi bage kin beberenta si diberu sekali embah.” E maka itukarken ngoahsa ku layo.

Kenca si diberu ioah kemberahen raja Kesunduten, minter nina, “Mbergeh kal kuakap.”

Kemberahen raja Kepultaken kenca ioahna permenna si dilaki, minter nina, “Melas kal kuakap.”

E maka pegancih rusur kemberahen si dua e ngoah anak si dilaki ras si diberu seh ku layo. Muat ku rumah i layo nari pe bage ka. Ku layo ras ku rumah, meriah sora gendang, sora bedil, sora mercun.

Reh dekahna, reh belinna, reh gedangna, reh gegehna duanna si Rindu Tubuh. Kenca enggo mbelin ia duanna, reh me kelegon ndekah kali ibas Kerajaan Negeri Benua Ketengahen. Kerina kalak kidaram kai sabapna jadi maka kelegon e. Entah lit mawen kalak sumbang, nina. Seh pendarami kalak kubas kalak si dua enda. E maka ningkalak kerina, “Erkiteken si Rindu Tubuh nge maka kelegon ndekah, seh senduduk pe la nai pang erpucuk. E maka ota bunuh si Rindu Tubuh duanna.”

(bersambung ke bagian 2)

Dari buku Seri Turi-Turin Karo : Beru Dayang Jile-jile, disusun oleh Masri Singarimbun dan Ngukumi Barus. 

Cetakan I tahun 1989. cetakan II tahun 1990. Penerbit Yayasan Merga Silima. Dicetak oleh PT. Kesaint Blanc Indah Corp.

Si Rindu Tubuh adalah satu cerita dari 13 cerita rakyat di buku ini.